Lansio Ymgynghoriad Awyr Dywyll

Mae ymgynghoriad cyhoeddus wedi cael ei lansio ar ‘Gynllunio ar gyfer Awyr Dywyll: Canllaw Cynllunio Atodol ar gyfer goleuadau yn Ardal o Harddwch Naturiol Eithriadol Bryniau Clwyd a Dyffryn Dyfrdwy”

Mae Cyngor Sir Ddinbych mewn partneriaeth â Chyngor Sir y Fflint, Cyngor Bwrdeistref Sirol Wrecsam ac Ardal o Harddwch Naturiol Eithriadol Bryniau Clwyd a Dyffryn Dyfrdwy yn ceisio barn ar nodyn Canllaw Cynllunio Atodol ar gyfer goleuadau yn yr AHNE.

Bydd y Canllawiau Cynllunio Atodol yn darparu cyngor ac arweiniad ar gyfer datblygwyr ac eraill ar ddyluniad goleuadau da yn yr AHNE.

Mae’r AHNE wedi’i ddynodi fel tirlun o bwysigrwydd cenedlaethol a’r prif bwrpas yw cadw a gwella ei harddwch naturiol.

Un o nodweddion arbennig cydnabyddedig yr AHNE yw ei natur heddychlon, sy’n cynnwys y cyfle i brofi awyr dywyll. Mae gan yr AHNE rai o’r awyr mwyaf tywyll yng Nghymru ac mae’r Canllawiau Cynllunio Atodol Drafft yn ceisio cadw a gwella’r nodwedd arbennig hwn drwy ddarparu canllawiau ar gyfer datblygwyr ac eraill ar ddyluniadau golau sy’n gyfeillgar i awyr dywyll.

Ar ôl cael ei gymeradwyo gan bob Awdurdod Cynllunio Lleol, bydd y Canllawiau Cynllunio Atodol yn ystyriaeth gynllunio materol wrth benderfynu ar geisiadau ac apeliadau cynllunio.

Dywedodd y Cynghorydd Tony Thomas, Cadeirydd Cyd-bwyllgor yr AHNE: “Mae AHNE Bryniau Clwyd a Dyffryn Dyfrdwy yn un o dirluniau mwyaf gwerthfawr Cymru. Mae’r ardal yn mwynhau rhai o’r awyr mwyaf tywyll yng Nghymru gan ddarparu cyfleoedd i brofi rhyfeddodau yr awyr dywyll.

“Bydd y Canllawiau Cynllunio Atodol yn helpu i gadw a gwella’r nodwedd arbennig hwn trwy godi ymwybyddiaeth o’r mater ac annog dyluniadau golau sy’n gyfeillgar i awyr dywyll.  Hoffwn glywed eich barn a byddaf yn annog gymaint o bobl â phosib i gymryd rhan yn y broses ymgynghori ac i gael dweud eu barn ar y Canllawiau Cynllunio Atodol drafft cyn y dyddiad cau ar 9 Awst.”

Mae’r tri Awdurdod Cynllunio Lleol a’r AHNE yn awyddus i glywed gan ystod eang o sefydliadau statudol ac anstatudol, cynghorau tref a chymuned, grwpiau gwirfoddol a’r cyhoedd, yn ogystal ag asiantwyr ac ymgynghorwyr cynllunio lleol.

 

Dylid anfon sylwadau ymlaen i Gyngor Sir Ddinbych sydd yn cydlynu’r ymgynghoriad ar ran y tri Awdurdod Cynllunio Lleol a’r AHNE.

 

Dylid anfon sylwadau ymlaen erbyn 5.00pm ar 9 Awst 2021 yn defnyddio un o’r dulliau canlynol:

• trwy e-bost: clwydianrangeaonb@denbighshire.gov.uk
• trwy Borth Ymgynghori Sir Ddinbych, neu yn ysgrifenedig ar Huw Rees, Rheolwr Gwasanaethau Cefn Gwlad a Threftadaeth, Gwasanaethau Cynllunio, Gwarchod y Cyhoedd a Chefn Gwlad, Blwch Post 62, Rhuthun, LL15 9AZ

 

Gellir cyfeirio unrhyw ymholiadau sy’n ymwneud â’r Canllawiau Cynllunio Atodol drafft neu’r ymgynghoriad at y cysylltiadau canlynol ym mhob Awdurdod Cynllunio Lleol:

• Sir Ddinbych: planningpolicy@denbighshire.gov.uk Ffôn: 01824 706916
• Sir y Fflint: developmentplans@flintshire.gov.uk Ffôn: 01352 703213
• Wrecsam: planning_policy@wrexham.gov.uk Ffôn: 01978 298994
• Partneriaeth AHNE: clwydianrangeaonb@denbighshire.gov.uk  Ffôn: 01824 712735

Gellir gweld y ddogfen ar wefannau Sir Ddinbych, Sir y Fflint, Wrecsam neu AHNE, ac mae copïau caled ar gael ar gyfer eu harchwilio yn llyfrgelloedd cyhoeddus Sir Ddinbych.